الكاهنة

اليوم كي جاو علموني بالعفو، الخبر هبط عليّا كي الصاعقة، كيني الأرض تزلزلت، قلبي غطس وترعبت، ثلاثين سنة وأنا نفيق فيهم ونرقد ورا هالحيوط وهالقضبان، عمرها ما جاتني قفة ولا زيارة ولا جواب، حكم الإعدام ما تنفذش أما تدفنت حيّة. دخلت في أول العشرينات، وقتلي كانوا كلمات حب، نجاح، أمل، مستقبل، مشروع، طموح، وعد، سفر عندهم معنى. اليوم جاو يعلموا فيّا اللي باش نرجع حرة، حرة من شنوة ومن شكون؟ وعبد كيفي أنا آش مازالت تعنيلو الحرية؟ وآش عندي ما نعمل بيها؟ اليوم جاو يعلموا فيّا اللي باش يرجعولي الحياة وقتلي ماعادش عندي الجهد لا باش نعيشها، لا باش نقاومها. ماعاد عندي شي يربطني بالبرّا، لا حضن، لا دار، لا أصحاب، لا أمالي، لا عبد ينطق حتى اسمي ويتفكرني شكون؟